أبوها راجل
أبوها راجل ديمقراطي و جه عندي و بقي دكتاتور
طلبت ايد بنت الواطي رفض يناسب بيجاما كاستور
و لما قامت ثورة التحرير و كل صايع ساب السرير و إتنحت بيجامة النظام
رحت واسيته في زنزانته و جايبله بيجاما من الكانتو و لباس ماركة لا انام
أبوها راجل اشتراكي يساري يعني عدو الرأسمالية
رحت لأبوها وقلت انا شاري قاللي مهر البت قضية
حتما تبقي من الثوار تبقي معارض من الأحرار تبقي ملف في امن الدولة
قلتله لا ده انا بسكوته بأكل زنجر و اشرب صودا و العمر مفيهوش مقاولة
أبوها راجل ليبرالي عالي شايف الحرية و لا اللذه
رحت طلبت بنت الغالي قاللي الكلمة في ايد المزه
انا حياة الله بس والدها تتجوز تتطلق براحتها انا مؤمن اوي بالحرية
فجأة لقتني قلبت سلفي احسن متأرطس من خلفي و ابقي ليبرالي الذرية
أبوها راجل من السلفيين دقنه ايه فور حاجة أصوليه
قلت اناسب من الصالحين و انا كافر من غير جلابية
خبطت ع الباب..عريس تقولش الراجل شاف ابليس مع اني حالق فرساتشي
قاللي اتوكل ياد يا أفرنجي البيت سلفي مش اخوانجي خد بعضك اوام و امشي
أبوها واحد من الإخوان متنظم له فكر جماعه
قاللي معندناش نسوان خلي عيالك في البلاعه
طالما ملكش دور سياسي و لا طمعان في الكراسي خليك في دور التمانية
يا عم انا جي اخطب البت أنا مش جي طالب البت في تغيير الماده التانية
أبوها رئيس حزب الكنبة غاوي روتانا و ميلودي دراما
قابلته حصري ع الكنبة قاللي اسمعني يا حبيب ماما
الجواز مهوش كليب لنانسي و لا بوسة يسرا في المنسي و لا افيه بتاع اللمبي
الجواز زي ابراهيم الابيض او بوكس في النمر الاسود تنضربه وتشرف جنبي
أيها المواطنون قرر الشاب تخليه عن فكرة الزواج و تفويض احلامه الي المجلس الاعلي للكيف
.والله الموفق و المستعان
من ديوان ( الحب في زمن النفسنة .. أنا ) ... ريتشارد فؤاد
No comments:
Post a Comment