يانا ... يا الفوضي
اعمليلك كل يوم ثورة نظميلك مليون مظاهرة اعتصمي ببطانية معفنة ع الاسفلت
صرخي بسقوط نظامي قولي اني اكبر حرامي اعمليني فرعون صنم من البازالت
انتي قله مندسه تتلم في تلت ساعة انتي اجندة ارميها اعملها فزاعه
انتي عميلة ثورية صهيونية امريكانية شيوعية سلفية من تنظيم الجماعه
اللي زيك يحسبها و يرضي و يفهم ان يانا .. يا الفوضي
يوم ما هتنحي و اخرج من حياتك هتخرج عليكي شياطين سلسلتها
يومها هتندمي وتبكي علي ذكرياتك و ساعتها هتفتكريني انا وقتها
هتحلفي بعصري و تقولي ناره و لا جنة حريتي .. افتكري كلمتي
فضلتي علي حلم ضحكوا عليكي بيه عشموكي بالحلق و قطعولك ودانك
قالولك إهربي من سجن مسجونه فيه جريتي صحراء و طلعتي في مكانك
انا كنت سجانك بس كنت بأحميكي من غدرهم ... اشبعي بحضنهم
ايوه انا فاسد و ظالم و ابو الحرامي حاسبوني انتوا يا ولاد الملايكه
اللي فيكوا مش حرامي يقف قدامي كلنا شركاء ورثة في نفس التركه
اشربي كرامه و لفيلك سيجارة ديمقراطية ... العيب مكانش فيا
من منكم بلا خطيئة .. فليرميها بحجر
من ديوان ( الحب في زمن النفسنة .. أنا ) ... ريتشارد فؤاد
No comments:
Post a Comment